Skognæringa blomstrar, og nøkkelen til 
større suksess er betre infrastruktur. Den nøkkelen er regjeringa i ferd med å vri om, meiner næringa sjølv.
Medan oljenæringa slit, ser skognæringa no optimistisk på framtida, etter ei lang tid med nedlegging av skogindustri. Ein kortare og billegare veg mellom skogen og industrien kan løyse ut eit stort ubrukt potensiale, meiner næringa.
Då landbruksminister Jon Georg Dale (Frp) møtte representantar frå skognæringa på tømmerkaia i Eikefjord, fekk han ros frå alle kantar. Og det på ei kai under utbygging, som regjeringa har lova inntil 14,5 millionar kroner til.
