17. mai blei avvikla på
tradisjonell vis i Eikefjord. Veiret var på lag med eikefjordingane og det var ikkje meir regnveir enn at all aktivitet ute vart gjennomført som planlagt.
Etter salutten av Audun Ramsdal kl 07:00 gjekk det slag i slag resten av dagen fram til borgartoget.
Elevane i 5. klasse hadde laga eit fint spel om 1814. Her viste dei i grove trekk historia frå Napoleonskrigane og fram til Grunnlova og eit sjølvstendig Norge.
Elevane i 8. klasse heldt som vanleg tale for barna. 
Barnetoget på veg mot sentrum
Etter flaggborg og skulemusikken har barnehagen sin faste plass i barnetoget.
Toget stopper på eldresenteret før turen går vidare til kyrkja.
Før kyrkja blir det lagt ned krans på støtta til Andreas Hesjedal.
I kyrkja hadde Lars Terje Standal prologen. Det er skuffande få som går i kyrkja 17. mai, her bør ein gjere noko med tidsskjema både i sentrum, Steinhovden og Storebru om ein vil beholde denne tradisjonen.
Etter kyrkja er det tradisjonelt matøkt. Litt for utspedd graut, men god stemning i gymsalen.
Ute på skuleplassen var det liv rundt alle vegar. Her prøver Oliver Fraas seg på fiske, men fant fort ut at fisketroa kun var i vegen.
Vaksenleikane var også i gang. I hesteskokastinga var det som vanleg Magne Karlsen som gjekk av med seieren.
Reidar Høyseth fekk æra av å holde tala på 200 års dagen for grunnlova. Han var spurt om å fortelje om historia lokalt og tok oss gjennom ei reise der han hovedsakleg fortalte om ting han sjølv hadde opplevd.
Borgartoget tok turen ut på Hovland, bort til Allhuset og tilbake på skuleplassen.
